करोना विषाणूने जगभर थैमान घातले असल्यामुळे सध्या हात स्वच्छ धुण्याचे महत्त्व प्रत्येक माध्यमातून सांगितले जात आहे. आधुनिक जगात रोगप्रसाराला प्रतिबंध करण्यासाठी हात निर्जंतुक करण्याचे महत्त्व सर्वप्रथम कोणी ओळखले असेल, तर ते होते हंगेरीचे डॉ. इग्नाझ सिमेलविस. हात धुण्याचे वैद्यकीय महत्त्व सर्वप्रथम ओळखणारी व्यक्ती असल्याचे श्रेय त्यांना दिले जाते. १९ मार्च १८४७ रोजी व्हिएन्ना जनरल हॉस्पिटलच्या प्रसूतिगृहात प्रमुख वैद्यकीय अधिकारी म्हणून त्यांची नियुक्ती झाली. तोपर्यंत बाळंतपणात होणारे माता आणि बालक मृत्यूचे प्रमाण खूप मोठे होते. डॉ. सिमेलविस यांनी त्यावर संशोधन केले आणि हातांच्या माध्यमातून जंतुसंसर्ग होत असल्याचा निष्कर्ष काढला. हात निर्जंतुक करून शस्त्रक्रिया केल्यास मृत्यूचे प्रमाण लक्षणीयरीत्या घटते हे त्यांनी सप्रमाण सिद्ध केले.
सध्या करोना विषाणूसंसर्गाच्या पार्श्वभूमीवर जागतिक आरोग्य संघटनेने (WHO) हात धुण्याची शास्त्रीय पद्धत वापरण्याची शिफारस केली आहे. या पद्धतीने हात कसे धुवावेत, याचे प्रात्यक्षिक दाखविणारा, डॉ. सिमेलविस यांचे अॅनिमेशन असलेला ५० सेकंदांचा व्हिडिओ गुगलने आज डूडलवर प्रसारित केला आहे. तो व्हिडिओ सोबत देत आहोत.